A.C. Faragulla: Faragullas

No ano 1981 creouse un grupo de baile tradicional en Teixeiro, que foi bautizado como “Faragulla” por Mercedes Peón.

As que fixeron que este proxecto se fixese posíbel foi a asociación de “Amas de Casa” de Teixeiro.

Pouco a pouco este grupo foi medrando e empezando a coller popularidade despois de diversas actuacións nas festas patronais do noso pobo, e en lugares próximos como a Ponte Carreira, Guitiriz, Betanzos ou Aranga.

Reises - 1984

Desprazáronse a diferentes lugares como Padrón, Cerdido, Betanzos ou aos xardíns de Méndez Núñez para participar en distintos certames folclóricos e Días da Muiñeira.

Milla Urbana - 1984

Dende o ano 1988 e durante oito anos consecutivos o grupo participou nos diferentes concursos que organizou a Asociación Cultural Xacarandaina no Teatro Colón da Coruña, no que participaban por categorías. Durante estes anos sempre conseguiron clasificarse entre os tres primeiros postos, aínda que posiblemente o ano máis relevante para eles fose o 1990, xa que acadaron o primeiro premio en dúas categorías distintas.

Mercedes Peón, persoa que lle deu o nome ao grupo por ser os nenos “pequenos como as mesmas faragullas do pan” foi a primeira mestra de baile desta asociación, que exerceu a súa labor durante dezasete anos.

Teatro Colón - 1990

Teatro Colón - 1985

Teatro Rosalía de Castro - 1990

Despois de todos estes anos e de conseguir tantos premios, no ano 2004 o grupo retomou as clases con Fernando Cruz, que durante a súa estancia como mestre, levou a asociación a actuar no programa Luar da TVG.

Pasados dous anos foi Henrique Peón o encargado de dar clase aos rapaces da asociación, e tan só un ano despois Xurxo Fernándes, actual mestre de baile e co que os compoñentes da asociación descubriron que o baile tradicional non era só ensaiar e participar en concursos, senón que tamén se podía gozar desta tradición de noso dunha maneira máis informal, a través das ruadas.